काठमाडौं । रूसले युक्रेनमा रहेका अमेरिकी कम्पनीका कारखाना तथा गोदामलाई लक्षित गरी मिसाइल र ड्रोन आक्रमण तीव्र बनाएको विवरण सार्वजनिक भइरहेका बेला अमेरिकी राष्ट्रपति डोनाल्ड ट्रम्पको मौनतामाथि प्रश्न उठ्न थालेको छ।
कोकाकोला, पेप्सिको र म्याकडोनाल्ड्ससँग सम्बन्धित संरचनाहरू रुसी आक्रमणबाट प्रभावित भएको बताइएको छ। तर पछिल्ला घटनाबारे ट्रम्प प्रशासनले सार्वजनिक रूपमा उल्लेख्य प्रतिक्रिया नदिएको भन्दै युक्रेनस्थित अमेरिकी व्यावसायिक क्षेत्रका प्रतिनिधिहरूले असन्तुष्टि जनाएका छन्।
अमेरिकी टेलिभिजन नेटवर्क सीएनएनका अनुसार, युक्रेनस्थित अमेरिकी चेम्बर अफ कमर्सका अध्यक्ष एन्डी हन्डरले अमेरिकी व्यवसायमाथि भइरहेको आक्रमण रोक्न पहल गर्नुपर्ने बताएका छन्। उनका अनुसार, रुसी मिसाइल र ड्रोन आक्रमणले अमेरिकी लगानी तथा व्यावसायिक संरचनामा प्रत्यक्ष क्षति पुर्याइरहेको छ।
गत सेप्टेम्बर ३ मा किभनजिकै रहेको कोकाकोलाको कारखानामा रुसी ड्रोन आक्रमण भएको थियो। त्यसपछि युक्रेनी राष्ट्रपति भोलोदिमिर जेलेन्स्कीले उक्त घटनालाई अमेरिकाका लागि स्पष्ट सन्देशका रूपमा व्याख्या गरेका थिए।
त्यस्तै, सेप्टेम्बर २५ मा म्याकडोनाल्ड्सका लागि प्रयोग हुने आपूर्ति साझेदारको गोदाममा रुसी ड्रोन प्रहार भएको थियो। आक्रमणबाट गोदाम क्षतिग्रस्त भएपछि त्यसको असर म्याकडोनाल्ड्सका केही रेस्टुरेन्टको आपूर्तिमा समेत परेको बताइएको छ।
यसअघि अगस्टको अन्त्यमा दक्षिणी युक्रेनको माइकोलाइभ क्षेत्रमा रहेको पेप्सिकोको उत्पादन केन्द्र पनि क्षतिग्रस्त भएको सीएनएनले जनाएको छ। उक्त घटनामा मानवीय क्षति नभएको कम्पनीले जनाएको थियो।
अमेरिकी कम्पनीका संरचनामाथि आक्रमण भइरहे पनि सबै कम्पनी यसबारे सार्वजनिक रूपमा बोल्न इच्छुक देखिएका छैनन्। केही कम्पनीले अमेरिकी सरकारको ध्यानाकर्षण गराउन खोजिरहेका छन् भने अन्यले व्यावसायिक तथा सुरक्षा संवेदनशीलताका कारण सावधानी अपनाएको हन्डरको भनाइ छ।
अमेरिकी सांसदहरूको एउटा समूहले भने ह्वाइट हाउसले अमेरिकी कम्पनीमाथिका आक्रमणबारे रूसलाई जवाफदेही बनाउनुपर्ने माग गरेको छ। युक्रेनले पनि आफ्नो भूभागमा रहेका अमेरिकी कम्पनीको सुरक्षा सुनिश्चित गर्न थप प्रतिरक्षा सहयोग आवश्यक रहेको बताउँदै आएको छ।
हन्डरले अमेरिकी राष्ट्रपति ट्रम्पका विशेष दूत स्टिभ विटकफ र ट्रम्पका ज्वाइँ ज्यारेड कुश्नरसँग भेट गरी युक्रेनमा अमेरिकी व्यवसायले सामना गरिरहेको अवस्थाबारे जानकारी गराउन खोजेको बताएका छन्। तर भेटका लागि गरिएको अनुरोधको जवाफ नआएको उनको भनाइ छ।
अमेरिकी प्रशासनको युक्रेन नीतिमा भने फरक प्राथमिकता देखिएको छ। ट्रम्पले युक्रेनले रूसको ऊर्जा पूर्वाधारमाथि गरिरहेका आक्रमणप्रति आपत्ति जनाउँदै आएका छन्। ती आक्रमणले इन्धन आपूर्ति र मूल्यमा असर पार्न सक्ने तथा अमेरिकी लगानीमा समेत प्रभाव पर्ने उनको प्रशासनको तर्क छ।
सीएनएनका अनुसार, युक्रेनले रुसी ऊर्जा पूर्वाधारमाथिको आक्रमण जारी राखे अमेरिकाले गुप्तचर सूचना र हतियार सहयोग सीमित गर्न सक्ने चेतावनीसमेत दिएको छ। ट्रम्पले भने रूस र युक्रेनबीचको युद्ध अन्त्य गर्न आफू र आफ्नो टोली प्रतिबद्ध रहेको बताउँदै आएका छन्।
यसअघि सन् २०२५ को अगस्टमा युक्रेनस्थित अमेरिकी इलेक्ट्रोनिक्स कारखानामा रुसी आक्रमण हुँदा ट्रम्पले सार्वजनिक प्रतिक्रिया दिएका थिए। उनले रुसी राष्ट्रपति भ्लादिमिर पुटिनसँग यस विषयमा असन्तुष्टि व्यक्त गरेको बताएका थिए। तर पछिल्ला घटनामा त्यस्तै प्रतिक्रिया नआएको भन्दै अमेरिकी व्यवसायका प्रतिनिधिहरूले प्रश्न उठाएका छन्।
विदेशी सेनाले आफ्ना कम्पनीका संरचनामाथि आक्रमण गर्दा अमेरिकी सरकारले स्पष्ट रूपमा आफ्नो पक्षमा उभिनुपर्ने हन्डरको भनाइ छ। अमेरिकी प्रशासनले युद्ध अन्त्यका लागि कूटनीतिक प्रयास जारी राखेको बताए पनि आफ्नै कम्पनीमाथिका आक्रमणबारे मौन रहनुको कारणबारे बहस जारी छ।
