काठमाडौं । रसुवाको भोटेकोशीमा आएको विनाशकारी बाढीपछि त्रिशूली र नारायणी नदी किनार हुँदै चितवनमा फेला परेका शवको पहिचान तथा व्यवस्थापन कार्य तीव्र पारिएको छ। प्रहरीले शवको व्यवस्थापनसँगै हराइरहेका व्यक्तिका आफन्तबाट डीएनए नमूना संकलन गरी वैज्ञानिक विधिबाट पहिचान गर्ने प्रक्रिया अघि बढाएको हो।
जिल्ला प्रहरी कार्यालय चितवनका प्रहरी नायब उपरीक्षक चन्द्रभूषण यादवका अनुसार हालसम्म जिल्लाका विभिन्न स्थानबाट ३६२ शव फेला परेका छन्। तीमध्ये ३३३ शवको व्यवस्थापन भइसकेको छ भने १४ शवको सनाखत भएपछि आफन्तको जिम्मा लगाइएको छ।
शवको वैज्ञानिक पहिचानका लागि प्रहरीले भदौ १६ गतेदेखि डीएनए नमूना संकलन सुरु गरेको हो। भदौ २० गतेसम्म हराइरहेका व्यक्तिका आफन्त गरी ६८ जनाको डीएनए नमूना संकलन गरिएको यादवले जानकारी दिए। प्रहरीका अनुसार भदौ १६ गते सात पुरुषको नमूना संकलन गरिएको थियो। त्यसैगरी भदौ १७ गते २६ जनाको नमूना लिइएकोमा दुई महिला, २२ पुरुष र दुई भारतीय पुरुष नागरिक रहेका थिए।
भदौ १८ गते २२ जनाको डीएनए नमूना संकलन गरिएको थियो। तीमध्ये चार महिला, १४ पुरुष, एक बालक र तीन भारतीय पुरुष नागरिक रहेका छन्। यस्तै, भदौ १९ गते सात जनाको नमूना संकलन गरिएकोमा एक महिला, चार पुरुष, एक बालक र एक भारतीय पुरुष नागरिक रहेका थिए। भदौ २० गते थप छ जनाको नमूना लिइएको प्रहरीले जनाएको छ। तीमध्ये दुई महिला, एक पुरुष र तीन बालक रहेका छन्।
बाढीपछि त्रिशूली र नारायणी नदीमा बगेर आएका शवमध्ये कतिपयको अवस्था पहिचान गर्न कठिन भएकाले डीएनए परीक्षणलाई प्राथमिकता दिइएको प्रहरीले जनाएको छ। आफन्तबाट संकलन गरिएको नमूनालाई शवबाट लिइएको नमूनासँग मिलान गरी पहिचान गर्ने प्रक्रिया अघि बढाइनेछ। प्रहरी नायब उपरीक्षक यादवका अनुसार शव खोजी, पहिचान, आफन्तको डीएनए नमूना संकलन, हराइरहेका व्यक्तिको विवरण संकलन तथा सम्बन्धित निकायसँगको समन्वय निरन्तर भइरहेको छ।
बाढीमा ठूलो संख्यामा मानिस बेपत्ता भएकाले चितवनमा फेला परेका शवको पहिचान चुनौतीपूर्ण बनेको छ। त्यसैले पहिचान हुन नसकेका शवको वैज्ञानिक परीक्षण र हराइरहेका व्यक्तिका आफन्तबाट संकलित डीएनए नमूनालाई आधार बनाएर पहिचान प्रक्रिया अघि बढाइएको प्रहरीले जनाएको छ।
