काठमाडौं । नेपाल प्रिमियर लिग (एनपीएल) को तेस्रो संस्करणमा चितवन राइनोजले विजयी सुरुवात गरेको छ । कीर्तिपुरस्थित त्रिवि क्रिकेट मैदानमा मंगलबार भएको रोमाञ्चक खेलमा चितवनले विराटनगर किङ्सलाई ८ रनले पराजित गरेको हो ।
चितवनले दिएको १५८ रनको लक्ष्य पछ्याएको विराटनगर १९.३ ओभरमा १४९ रनमै समेटियो । अन्तिम ओभरसम्म रोमाञ्चक बनेको खेलमा विराटनगरलाई लक्ष्यसम्म पुग्न नदिँदै चितवनले महत्वपूर्ण जित हात पार्यो ।
विराटनगरका लागि इमरान शेखले सर्वाधिक ३९ रन बनाए । आन्द्रे रसेलले आक्रामक ब्याटिङ गर्दै मात्र १७ बलमा ३३ रन जोडे । उनले चार छक्का र एक चौका प्रहार गरे । यस्तै, लोकेश बमले २६ र बसिर अहमदले १३ रन बनाए पनि टोलीलाई जित दिलाउन सकेनन् ।
चितवनको जितमा बलर कमल सिंह ऐरी नायक बने । उनले चार विकेट लिँदै विराटनगरको ब्याटिङ लाइनअपलाई धराशायी बनाए । रिजन ढकालले दुई विकेट लिए भने टम टेलर, डान मोस्ली, मौसम ढकाल र रन्जित कुमारले एक–एक विकेट हात पारे ।
त्यसअघि टस हारेर पहिले ब्याटिङ गरेको चितवनले निर्धारित २० ओभरमा तीन विकेट गुमाउँदै १५७ रन बनाएको थियो । चितवनका लागि डेविड मलानले उत्कृष्ट ब्याटिङ गर्दै ७० रनको अर्धशतकीय इनिङ्स खेले । उनले पाँच छक्का र पाँच चौका प्रहार गरे ।
यस्तै, रवि बोपारा ३२ र डान मोस्ली २९ रनमा अविजित रहे । देव खनालले १२ रनको योगदान दिए । विराटनगरका एंगेलो म्याथ्युज, आन्द्रे रसेल र चरिथ असलंकाले एक-एक विकेट लिए ।
ब्याटिङमा मलानको उत्कृष्ट प्रदर्शन र बलिङमा कमल सिंह ऐरीको घातक स्पेलको मद्दतमा चितवनले प्रतियोगितामा सुखद सुरुवात गरेको छ । यता, जितको नजिक पुगेको विराटनगर भने रोमाञ्चक खेलमा ८ रनले पराजित हुँदै प्रतियोगिताको पहिलो खेलमै निराश बनेको छ।
-1793079507.jpg)
-1793079507.jpg)
