काठमाडौं । लुम्बिनी विकास कोषको उपाध्यक्षमा आनी छोइङ डोल्माको नियुक्ति बदर गर्न माग गर्दै आन्दोलन गरिरहेको लुम्बिनी बचाउ महाअभियानका संयोजकसहित दुई जना पक्राउ परेका छन् । प्रहरीले अभियानका संयोजक ६१ वर्षीय अकरम खान र लुम्बिनी सांस्कृतिक नगरपालिका-९ का ३३ वर्षीय वाविउद्दिन मुसलमानलाई गएराति पक्राउ गरेको हो ।
अभियानका सहसंयोजक रामविकास चौधरीका अनुसार प्रहरीले लुम्बिनी पर्साचोकस्थित घरमा सुतिरहेको अवस्थामा उनीहरूलाई पक्राउ गरेको हो । शान्तिपूर्ण रूपमा आफ्ना माग राख्दै आन्दोलन गरिरहेका व्यक्तिमाथि मध्यरातमा धरपकड गरिएको भन्दै महाअभियानले दुवै जनालाई निःशर्त रिहा गर्न माग गरेको छ ।
यता, जिल्ला प्रहरी कार्यालय रुपन्देहीले भने सार्वजनिक स्थानमा ‘उच्छृंखल गतिविधि’ गरेको आरोपमा उनीहरूलाई पक्राउ गरिएको जनाएको छ । प्रहरीले दुवै जनालाई अनुसन्धानका लागि जिल्ला प्रहरी कार्यालय भैरहवामा राखिएको पुष्टि गरेको छ ।
लुम्बिनी विकास कोषको उपाध्यक्षमा आनी छोइङ डोल्मालाई नियुक्त गरिएपछि उनको नियुक्तिलाई लिएर विवाद चर्किँदै गएको छ । महाअभियानले नियुक्ति बदर गरी कोषको उपाध्यक्षमा स्थानीय योग्य व्यक्तिलाई नियुक्त गर्न माग गर्दै चरणबद्ध आन्दोलन गर्दै आएको छ । आन्दोलनकै क्रममा सोमबार दिउँसो अभियानले पर्साचोकमा संस्कृति तथा पर्यटनमन्त्री गनेश पौडेलको पुत्लासमेत दहन गरेको थियो ।
आनीको नियुक्तिलाई लिएर महाअभियानसँगै कपिलवस्तु तिलौराकोट संघर्ष समिति, लुम्बिनी क्षेत्रका प्रदेश सांसद तथा पूर्वमन्त्री चन्द्रकेश गुप्ता, वरिष्ठ अधिवक्ता दिनेश त्रिपाठी र राष्ट्रिय जेनजी नागरिक अभियानलगायतले पनि विरोध जनाउँदै आएका छन् ।
विरोध गर्ने पक्षले कोषको उपाध्यक्ष पदका लागि आवेदन नै नदिएकी आनीलाई नियुक्त गरिएको भन्दै प्रश्न उठाएको छ । उनीहरूले आनीले वंशजका आधारमा नागरिकता प्राप्त गरेको विषय तथा हङकङबाट प्राप्त गरेको भनिएको करोडौँ रकमको वैधता र पारदर्शिताबारे समेत प्रश्न उठाउँदै निष्पक्ष छानबिनको माग गरेका छन् ।
आनीमाथि उठेका प्रश्नहरूको निष्पक्ष छानबिन गरी उनी निर्दोष साबित भएपछि मात्रै नियुक्ति स्वीकार गर्न सकिने विरोधमा उत्रिएका पक्षहरूको भनाइ छ । यद्यपि, यी विषयमा उठेका आरोप र प्रश्नहरूको आधिकारिक पुष्टि तथा अनुसन्धानको निष्कर्ष सार्वजनिक हुन बाँकी छ ।
आनीको नियुक्तिविरुद्धको आन्दोलनका क्रममा अभियानका संयोजकसहित दुई जना पक्राउ परेपछि लुम्बिनी विकास कोषको नेतृत्व चयनसम्बन्धी विवादसँगै आन्दोलनकारीमाथिको प्रहरी कारबाही पनि चर्चामा आएको छ । अब पक्राउ परेका दुवै जनामाथिको अनुसन्धान र नियुक्ति विवादमा सम्बन्धित निकायले लिने निर्णयले यस प्रकरणको आगामी दिशा निर्धारण गर्ने देखिन्छ।
-1793079507.jpg)
-1793079507.jpg)
