काठमाडौं । दक्षिण अफ्रिकी स्टार ब्याटर डेभिड मिलरले नेपाल प्रिमियर लिग (एनपीएल) मा डेब्यु खेलमै विस्फोटक ब्याटिङ गर्दै अविजित ९३ रन बनाए पनि कर्णाली याक्सलाई जित दिलाउन सकेनन् । मिलरको एकल संघर्षका बाबजुद कर्णाली सुदूरपश्चिम रोयल्ससँग ३९ रनले पराजित भएको छ ।
कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा शुक्रबार भएको खेलमा सुदूरपश्चिमले दिएको १७७ रनको लक्ष्य पछ्याएको कर्णालीले निर्धारित २० ओभरमा ७ विकेट गुमाउँदै १३६ रन मात्र बनाउन सक्यो ।
कर्णालीका लागि मिलरले ५५ बलमा ५ चौका र ७ छक्का प्रहार गर्दै अविजित ९३ रन बनाए । तर, उनलाई अर्को छेउबाट अन्य ब्याटरले अपेक्षित साथ दिन सकेनन् । विकेटकिपर दीपक डुम्रेले १२ बलमा ३ चौका र एक छक्कासहित १८ रन जोड्नुबाहेक अन्य ब्याटरले दोहोरो अंकमा रन बनाउन सकेनन् ।
बलिङतर्फ सुदूरपश्चिमका स्कट कुगेलेइनले सर्वाधिक दुई विकेट लिए । हेमन्त धामी, अनिल खरेल, कप्तान दीपेन्द्रसिंह ऐरी, थरिन्दु रत्नायके र अविनाश बोहराले समान एक-एक विकेट लिए ।
यसअघि टस हारेर पहिले ब्याटिङ गरेको सुदूरपश्चिमले निर्धारित २० ओभरमा ६ विकेट गुमाएर १७६ रन बनाएको थियो ।
सुदूरपश्चिमका लागि ओपनर सैफ अली जैबले सर्वाधिक ३५ रन बनाए । उनले २४ बलमा ४ चौका र एक छक्का प्रहार गरे । त्यस्तै विनोद भण्डारीले २२ बलमा २ चौका र २ छक्काको मद्दतमा २७ रन जोडे ।
जैब र भण्डारीले पहिलो विकेटका लागि ६८ रनको साझेदारी गर्दै टोलीलाई राम्रो सुरुवात दिलाएका थिए । तर, आठौँ ओभरमा भण्डारी र नवौँ ओभरमा जैब आउट भएपछि सुदूरपश्चिमको रनगति केही सुस्ताएको थियो ।
त्यसपछि ब्रान्डन म्याकमुलेनले १६ बलमा २४ रन तथा इशान पाण्डेले १३ बलमा २३ रन बनाए । कप्तान दीपेन्द्रसिंह ऐरीले १० र आरिफ शेखले ११ रन जोडे ।
अन्तिम ओभरहरूमा थरिन्दु रत्नायकेले आक्रामक ब्याटिङ गर्दै १२ बलमा ३ चौका र एक छक्कासहित अविजित २२ रन बनाए । स्कट कुगेलेइनले पनि ६ बलमा २ चौकासहित अविजित १३ रन जोडे । सुदूरपश्चिमले अन्तिम पाँच ओभरमा मात्रै ५७ रन थपेको थियो ।
कर्णालीका लागि मार्क वाटले दुई विकेट लिए भने नन्दन यादव, हुसेन तलत र सूर्य तामाङले समान एक–एक विकेट हात पारे ।
यस जितसँगै पाँच खेल खेलेको सुदूरपश्चिमले तेस्रो जित दर्ता गर्दै ६ अंक जोडेको छ । टोली अंक तालिकाको दोस्रो स्थानमा उक्लिएको छ ।
यता चार खेल खेलेको कर्णालीको भने यो लगातार दोस्रो हार हो । चार अंकसहित कर्णाली अंक तालिकाको पाँचौँ स्थानमा झरेको छ ।
यसरी एनपीएल डेब्युमा डेभिड मिलरले आफ्नो विस्फोटक ब्याटिङबाट दर्शकको मन जिते पनि टोलीलाई जितको स्वाद चखाउन सकेनन् । व्यक्तिगत प्रदर्शनमा चम्किएका मिलरका लागि सुदूरपश्चिमविरुद्धको खेल भने निराशाजनक हारमा टुंगिएको छ ।
