एजेन्सी । साउदी अरबको राजधानी रियादस्थित किङ खालिद अन्तर्राष्ट्रिय विमानस्थलमा भएको क्षेप्यास्त्र आक्रमणमा १२ जनाको मृत्यु भएको छ भने ३०९ जना घाइते भएका छन्। घटनापछि साउदी नेतृत्वको गठबन्धनले यमनका हुथी विद्रोहीविरुद्ध निर्णायक जवाफ दिने चेतावनी दिएको छ।
गठबन्धनले इरान समर्थित हुथी समूहलाई आक्रमणको जिम्मेवार ठहर गर्दै घटनालाई युद्ध अपराधको संज्ञा दिएको छ। साउदी नागरिक उड्डयन प्राधिकरणका अनुसार मृतकमा चार साउदी नागरिकसहित विभिन्न देशका नागरिक रहेका छन्। घाइतेमध्ये केहीको अवस्था गम्भीर रहेको बताइएको छ।
आक्रमणपछि विमानस्थलको सञ्चालन रोकिएको थियो। आन्तरिक उडान टर्मिनलमा क्षेप्यास्त्र प्रहार भएपछि यात्रुहरूबीच भागाभाग मच्चिएको थियो। घाइतेमध्ये मक्का जान लागेका तीर्थयात्रीसमेत रहेको जनाइएको छ।
गठबन्धनका प्रवक्ता तुर्की अल(माल्कीले सर्वसाधारण यात्रु र विमानस्थलका कर्मचारीमाथि भएको आक्रमणको निन्दा गर्दै दोषीलाई जवाफदेही बनाउने बताएका छन्। यद्यपि, हुथी विद्रोहीले आक्रमणको जिम्मेवारी तत्काल लिएका छैनन्।
घटनापछि रियादका विद्यालयले एक सातासम्म अनलाइन कक्षा सञ्चालन गर्ने निर्णय गरेका छन्। अमेरिका, क्यानडा, जर्मनी र स्पेनका दूतावासले पनि आफ्ना नागरिकलाई विमानस्थल नजान चेतावनी दिएका छन्। अमेरिकी राष्ट्रपति डोनाल्ड ट्रम्पले आक्रमणलाई अस्वीकार्य भन्दै हुथीविरुद्धको सैन्य कारबाहीमा अमेरिका सहभागी हुन सक्ने सङ्केत गरेका छन्।
पाकिस्तानका प्रधानमन्त्री शहबाज सरिफले पनि आक्रमणको निन्दा गर्दै साउदी अरबको सुरक्षाप्रति आफ्नो देशको प्रतिबद्धता दोहोर्याएका छन्।
यमनमा साउदी समर्थित सरकारी फौज र हुथी विद्रोहीबीच द्वन्द्व चर्किरहेका बेला भएको यस घटनाले मध्यपूर्वमा क्षेत्रीय तनाव थप बढ्न सक्ने आशङ्का गरिएको छ।
