एजेन्सी । उमेर बढ्दै जाँदा खेलाडीको गति र प्रदर्शन खस्किने फुटबलको पुरानो मान्यता लियोनल मेस्सीले निरन्तर गलत साबित गरिरहेका छन्। ३९ वर्षको उमेरमा पनि उनी विश्व फुटबलकै सबैभन्दा प्रभावशाली खेलाडीका रूपमा उभिएका छन्। दौडधूपभन्दा खेल बुझ्ने क्षमता, सही समयमा सही स्थानमा पुग्ने कला र अद्भुत निर्णय क्षमताले मेस्सी आज पनि विपक्षी टोलीका लागि सबैभन्दा ठूलो चुनौती बनेका छन्।
जारी फिफा विश्वकपमा पनि मेस्सीले उत्कृष्ट लय कायम राखेका छन्। अस्ट्रियाविरुद्ध पेनाल्टी चुकाए पनि दुई गोल गर्दै उनले विश्वकप इतिहासमा सर्वाधिक गोल गर्ने मिरोस्लाभ क्लोसको कीर्तिमान तोडे। त्यसपछि जोर्डनविरुद्ध बेन्चबाट मैदान प्रवेश गर्दै शानदार फ्रि-किक गोल गरे। हालसम्म उनले विश्वकपका ६ संस्करणमा कुल १९ गोल गर्दै अर्को ऐतिहासिक उपलब्धि आफ्नो नाममा लेखाएका छन्।
मेस्सीको खेल शैली अहिले पहिलेभन्दा अझ परिपक्व बनेको विश्लेषण गरिएको छ। उनी अनावश्यक रूपमा दौडिँदैनन्, बरु आफ्नो ऊर्जालाई जोगाएर निर्णायक क्षणमा प्रयोग गर्छन्। बलबिना हिँडिरहेको जस्तो देखिए पनि उनी निरन्तर खेलको लय, खाली स्थान र विपक्षीको चाल अध्ययन गरिरहेका हुन्छन्। यही कारण बल पाउनेबित्तिकै उनी खेलको दिशा बदल्न सक्षम हुन्छन्।
तथ्यांकले पनि मेस्सीको यो शैलीलाई पुष्टि गर्छ। कतार विश्वकपमा उनले खेलेको अधिकांश समय हिँडेरै बिताएका थिए। तर, कम दौडिए पनि गोल गर्ने औसतमा उनी अन्य स्टार खेलाडीभन्दा अगाडि देखिएका छन्। जहाँ केही खेलाडीले आफ्नो खेल गति र शारीरिक शक्तिमा आधारित बनाएका छन्, त्यहीँ मेस्सीले बुद्धिमत्ता, अनुभव र असाधारण खेल दृष्टिका कारण आफूलाई फरक स्तरमा स्थापित गरेका छन्।
१६ जुन २००६ मा १८ वर्षको उमेरमा पहिलो विश्वकप गोल गरेका मेस्सीले ठीक २० वर्षपछि २०२६ विश्वकपमा पनि ह्याट्रिक गर्दै आफ्नो निरन्तरता कायम राखेका छन्। फुटबल विश्लेषकहरूका अनुसार मेस्सीको खेल समयसँगै कमजोर भएको होइन, बरु झन् निखारिँदै गएको छ। यही कारण आज पनि विश्व फुटबलमा एउटा भनाइ उत्तिकै सान्दर्भिक बनेको छ—ूपछिल्लो मेस्सी नै सधैं उत्कृष्ट मेस्सी हुन्छन्।ू
