काठमाडौं । नेपाल प्रिमियर लिग (एनपीएल) मा सुदूरपश्चिम रोयल्सले काठमाडौं गोर्खाजलाई पराजित गर्दै प्लेअफमा स्थान सुरक्षित गरेको छ। कीर्तिपुरस्थित त्रिवि अन्तर्राष्ट्रिय क्रिकेट मैदानमा शुक्रबार भएको प्रतिस्पर्धात्मक खेलमा सुदूरपश्चिमले काठमाडौंलाई ७ रनले हराएको हो।
सुदूरपश्चिमले दिएको १२६ रनको लक्ष्य पछ्याएको काठमाडौंले निर्धारित २० ओभरमा ७ विकेट गुमाएर ११८ रन मात्रै बनाउन सक्यो। अन्तिमसम्म रोमाञ्चक बनेको खेलमा काठमाडौं लक्ष्यसम्म पुग्न असफल भयो।
काठमाडौंका लागि राशिद खानले अविजित ३५ रन बनाए। उनले ३१ बलमा पाँच चौका प्रहार गरे। दुसान हेमन्थाले २१ रन जोड्दा अन्य ब्याटरले उल्लेखनीय प्रदर्शन गर्न सकेनन्।
एक समय ४८ रनमै पाँच विकेट गुमाएर संकटमा परेको काठमाडौंको इनिङ्स राशिद र हेमन्थाले सम्हाल्ने प्रयास गरेका थिए। उनीहरूले छैटौँ विकेटका लागि ३४ रनको साझेदारी गरे पनि टोलीलाई जिताउन सकेनन्।
सुदूरपश्चिमका बलर अनिल खरेलले दुई विकेट लिए। स्कट कुगेलेइन, हेमन्त धामी र फाबियन एलनले समान एक विकेट हात पारे।
त्यसअघि टस हारेर पहिले ब्याटिङ गरेको सुदूरपश्चिमले निर्धारित २० ओभरमा ६ विकेट गुमाएर १२५ रन बनाएको थियो। खराब सुरुवात गरेको सुदूरपश्चिमले आठ रनमै चार विकेट गुमाएको थियो।
तर कप्तान दीपेन्द्र सिंह ऐरीले जिम्मेवारीपूर्ण ब्याटिङ गर्दै टोलीको इनिङ्स सम्हाले। उनले ५५ बलमा पाँच चौका र दुई छक्काको मद्दतमा सर्वाधिक ६० रन बनाए। जारी प्रतियोगितामा दीपेन्द्रको यो दोस्रो अर्धशतक हो।
दीपेन्द्रले आरिफ शेखसँग पाँचौँ विकेटका लागि ५४ रनको महत्वपूर्ण साझेदारी गरे। आरिफले १६ रन बनाए। त्यसपछि थरिन्दु रत्नायकेसँग छैटौँ विकेटका लागि पनि ५४ रनकै साझेदारी गर्दै दीपेन्द्रले टोलीलाई सम्मानजनक योगफलसम्म पुर्याए। थरिन्दु २६ रनमा अविजित रहे।
काठमाडौंका जहानदाद खानले उत्कृष्ट बलिङ गर्दै तीन विकेट लिए भने सन्तोष यादवले दुई विकेट हात पारे।
जितसँगै सात खेलबाट १० अंक जोडेको सुदूरपश्चिम अंकतालिकाको शीर्ष स्थानमा उक्लिएको छ। टोलीले प्लेअफमा स्थान पक्का गर्दै शीर्ष दुईमा रहेर पहिलो क्वालिफायर खेल्ने सम्भावना पनि बलियो बनाएको छ।
यता, लगातार चार खेल जितेको काठमाडौंले प्रतियोगितामा पहिलो हार बेहोरेको छ। ६ खेलबाट आठ अंक जोडेको काठमाडौं तेस्रो स्थानमा छ। उसले लिग चरणको अन्तिम खेलमा आइतबार पोखरा एभेन्जर्ससँग प्रतिस्पर्धा गर्नेछ। उक्त खेल जिते काठमाडौंलाई शीर्ष दुईमा पुग्ने अवसर कायम रहनेछ।
-1794481764.jpg)
-1794481764.jpg)
