एजेन्सी । युरोपेली मुलुक पोल्यान्डको ऐतिहासिक तथा पर्यटकीय सहर क्राकोमा भएको अन्धाधुन्ध गोलीकाण्डले देशलाई स्तब्ध बनाएको छ। मुख्य बजार क्षेत्रमा एक व्यक्तिले कारबाट गोली चलाउँदा कम्तीमा ६ जनाको मृत्यु भएको छ भने १५ जना घाइते भएका छन्। प्रहरीले गोली चलाउने संदिग्धलाई घाइते अवस्थामा नियन्त्रणमा लिएर अस्पताल पुर्याएको छ।
शनिबार दिउँसो स्थानीय समयअनुसार करिब ३ बजे क्राकोको व्यस्त बजार क्षेत्रमा गोली चलेको थियो। घटनामा चार महिला र दुई पुरुषको मृत्यु भएको पोलिस अधिकारीहरूले जनाएका छन्। घाइतेमध्ये पाँच जना विदेशी नागरिक रहेको बताइएको छ।
प्रत्यक्षदर्शीका अनुसार गोली चल्न थालेपछि बजार क्षेत्रमा भागाभाग मच्चिएको थियो। ज्यान जोगाउन मानिसहरू नजिकैका पसल तथा रेस्टुरेन्टमा लुकेका थिए। घटनास्थलमा तत्काल पुगेको प्रहरीले करिब तीन मिनेटभित्रै जवाफी कारबाही गर्दै संदिग्धलाई नियन्त्रणमा लिएको थियो। प्रहरीको गोली लागेर घाइते भएका उनलाई उपचारका लागि अस्पताल लगिएको हो।
पोल्यान्डकै नागरिक रहेका संदिग्धको कारबाट थप हतियार र ठूलो परिमाणमा गोलीगट्ठासमेत बरामद भएको प्रहरीले जनाएको छ। घटनापछि प्रहरीले उनको घरमा खानतलासी गर्दा थप तीन जनाको शव फेला पारेको छ। ओस्त्रोवियेत्स स्विएन्तोक्रिस्कीस्थित घरमा दुई महिला र एक पुरुषको शव भेटिएको प्रधानमन्त्री डोनाल्ड टस्कले जानकारी दिएका छन्। उनीहरू संदिग्धका निकट परिवारका सदस्य हुन सक्ने प्रारम्भिक अनुमान गरिए पनि क्राकोको गोलीकाण्डसँग उनीहरूको मृत्युको सम्बन्ध पुष्टि भइसकेको छैन।
पोल्यान्डका गृहमन्त्री मार्सिन किएर्विन्स्कीले संदिग्ध दक्षिणपन्थी अतिवादी विचारधाराबाट प्रभावित हुन सक्ने प्रारम्भिक संकेत देखिएको बताएका छन्। यद्यपि, आक्रमणको वास्तविक उद्देश्य र घटनाको पृष्ठभूमिबारे अनुसन्धान जारी छ। अनुसन्धानमा प्रहरीसँगै आन्तरिक सुरक्षा निकायसमेत परिचालित भएका छन्।
घटनाको जानकारी पाएपछि प्रधानमन्त्री डोनाल्ड टस्क स्वयं क्राको पुगेका थिए। उनले तत्काल घटनास्थल पुगेर आक्रमणकारीलाई नियन्त्रणमा लिने प्रहरीको सक्रियताको प्रशंसा गरेका छन्। प्रहरीको छिटो हस्तक्षेपले थप ठूलो मानवीय क्षति हुनबाट जोगाएको अधिकारीहरूको भनाइ छ।
घटनापछि क्राकोमा शोक छाएको छ। सहरका मेयरले बुधबारसम्म शोक अवधि घोषणा गरेका छन् भने राष्ट्रपति कारोल नाभ्रोस्कीले नोभेम्बर ८ र ९ मा राष्ट्रिय शोक घोषणा गरेका छन्। युक्रेनी राष्ट्रपति भोलोदिमिर जेलेन्स्की र युरोपेली संघकी विदेशनीति प्रमुख काया कलासले पनि घटनाप्रति दुःख व्यक्त गर्दै पीडित परिवारप्रति समवेदना प्रकट गरेका छन्।
करिब तीन करोड ८० लाख जनसङ्ख्या रहेको पोल्यान्डमा सामूहिक गोलीकाण्डका घटना तुलनात्मक रूपमा दुर्लभ मानिन्छन्। यस्तो अवस्थामा व्यस्त पर्यटकीय क्षेत्रमा भएको यस आक्रमणले सार्वजनिक सुरक्षा र हिंसात्मक अतिवादको जोखिमबारे गम्भीर प्रश्न उठाएको छ। घटनाको थप अनुसन्धान भइरहेको छ।
