काठमाडौं । नेपाल प्रिमियर लिग (एनपीएल) क्रिकेटको तेस्रो संस्करणअन्तर्गत आज बिहीबार दुई खेल हुँदैछन्। कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा हुने दुवै खेलमा चार टोली प्रतिस्पर्धामा उत्रिँदैछन्।
दिनको पहिलो खेलमा दिउँसो साढे १२ बजे लुम्बिनी लायन्स र जनकपुर बोल्ट्सबीच प्रतिस्पर्धा हुनेछ। जारी प्रतियोगितामा राम्रो लयमा देखिएको लुम्बिनी लगातार तेस्रो जितको खोजीमा मैदान उत्रिनेछ।
लुम्बिनीले अहिलेसम्म खेलेका तीन खेलमध्ये दुईमा जित निकालेको छ भने एक खेलमा अङ्क बाँडेको छ। पाँच अङ्कसहित तालिकाको शीर्ष स्थानमा रहेको लुम्बिनी आफ्नो अपराजित यात्रा कायम राख्न चाहन्छ। टोलीका रुबेल ट्रिम्पलम्यान र किशोर महतोले यस सिजन उत्कृष्ट प्रदर्शन गरिरहेका छन्।
यता, जनकपुर बोल्ट्स पनि तेस्रो जितको खोजीमा हुनेछ। चार खेल खेलेको जनकपुरले दुईमा जित र दुईमा हार बेहोर्दै चार अङ्क जोडेको छ। तालिकाको चौथो स्थानमा रहेको जनकपुरका लागि हरमित सिंह र इंग्लिस अलराउण्डर मोइन अली महत्वपूर्ण खेलाडी हुन्।
पहिलो खेलमा दुवै टोली जित निकाल्दै अंकतालिकामा आफ्नो स्थिति थप मजबुत बनाउने लक्ष्यमा हुनेछन्।
यसैगरी, आजै साँझ ५ बजे हुने दोस्रो खेलमा काठमाडौं गोर्खाज र विराटनगर किंग्स आमनेसामने हुनेछन्। दुई खेल खेलेको काठमाडौंले एकमा जित र एकमा हार बेहोरेको छ। दुई अङ्कसहित तालिकाको पुछारबाट दोस्रो स्थानमा रहेको काठमाडौंलाई शीर्ष टोलीहरूसँगको दूरी घटाउन जित आवश्यक छ।
अर्कोतर्फ, सन्दीप लामिछानेको कप्तानीमा रहेको विराटनगर किंग्स चार खेलबाट दुई जित निकाल्दै चार अङ्कसहित तालिकाको दोस्रो स्थानमा छ। विराटनगर आज तेस्रो जित निकाल्दै शीर्ष स्थानतर्फ अघि बढ्ने योजनामा हुनेछ।
विराटनगरका लागि आन्द्रे रसेल मुख्य खेलाडीका रूपमा रहेका छन्। ब्याटिङ र बलिङ दुवैमा प्रभाव जमाउन सक्ने रसेलले यसअघिको खेलमा जनकपुरविरुद्ध उत्कृष्ट प्रदर्शन गर्दै टोलीलाई जित दिलाउन महत्वपूर्ण भूमिका खेलेका थिए।
समग्रमा आजका दुवै खेल अंकतालिकाको समीकरणका दृष्टिले महत्वपूर्ण छन्। लुम्बिनी आफ्नो अपराजित लय कायम राख्न चाहँदा जनकपुर जितको लय समात्ने प्रयासमा हुनेछ। त्यस्तै, काठमाडौंलाई अंकतालिकामा सुधार गर्ने अवसर हुनेछ भने विराटनगर शीर्ष स्थानको दौडमा आफूलाई बलियो बनाउने लक्ष्यमा मैदान उत्रिनेछ।
-1793790721.jpg)
-1793790721.jpg)
