काठमाडौं । नेपाल प्रिमियर लिग (एनपीएल) अन्तर्गत मंगलबार भएको रोमाञ्चक खेलमा विराटनगर किंग्सले जनकपुर बोल्ट्सलाई २ रनले पराजित गरेको छ। वेस्ट इन्डिजका स्टार अलराउन्डर आन्द्रे रसेलको उत्कृष्ट प्रदर्शनमा विराटनगरले रोमाञ्चक जित निकालेको हो।
कीर्तिपुरस्थित त्रिवि अन्तर्राष्ट्रिय क्रिकेट मैदानमा विराटनगरले दिएको १७५ रनको लक्ष्य पछ्याएको जनकपुरले निर्धारित २० ओभरमा ७ विकेट गुमाएर १७२ रन मात्रै बनाउन सक्यो। अन्तिम ओभरसम्म जितको सम्भावना कायम राखेको जनकपुर लक्ष्यभन्दा दुई रनले पछि पर्यो।
जनकपुरलाई अन्तिम ओभरमा जितका लागि १३ रन आवश्यक थियो। तर बलिङमा आएका रसेलले उत्कृष्ट प्रदर्शन गर्दै दुई विकेट लिएर १० रन मात्रै खर्चिए। उनको यही प्रदर्शन विराटनगरको जितमा निर्णायक बन्यो।
जनकपुरका लागि सैफ हसनले सर्वाधिक ७१ रन बनाए। उनले ४८ बलमा २ चौका र ५ छक्का प्रहार गरे। यस्तै विशाल सुस्लिङले ३० बलमा २ चौका र ३ छक्कासहित ४३ रन जोडे। जिमी निशमले १५ बलमा ३ छक्काको मद्दतमा २७ रन बनाए भने मोइन अलीले १० रनको योगदान दिए। जनकपुरको ब्याटिङलाई रोक्ने क्रममा रसेलले ४ विकेट लिए। एन्जेलो म्याथ्युजले २ तथा रुपेश सिंहले १ विकेट हात पारे।
यसअघि टस हारेर पहिले ब्याटिङ गरेको विराटनगरले निर्धारित २० ओभरमा ३ विकेट गुमाएर १७४ रन बनाएको थियो। विराटनगरका ओपनर इमरान शेख र लोकेश बमले उत्कृष्ट ब्याटिङ गर्दै शतकीय साझेदारी गरेका थिए। इमरानले ४५ बलमा ५ चौका र २ छक्कासहित ५६ रन बनाए भने लोकेशले ४० बलमा ३ चौका र ३ छक्काको मद्दतमा ५० रन जोडे।
त्यसपछि क्रिजमा आएका रसेलले आक्रामक ब्याटिङ गर्दै टोलीको स्कोर उकासे। उनले २९ बलमा २ चौका र ५ छक्कासहित अविजित ५२ रन बनाए। शुभमन रन्जने ७ रनमा अविजित रहे। जनकपुरका लागि अभिषेक तिवारीले २ तथा मोइन अलीले १ विकेट लिए।
ब्याटिङ र बलिङ दुवैमा प्रभावशाली प्रदर्शन गरेका रसेलले विराटनगरलाई महत्त्वपूर्ण जित दिलाएका छन्। अन्तिम ओभरसम्म रोमाञ्चक बनेको खेलमा उनको अलराउन्ड प्रदर्शन नै विराटनगरको जितको मुख्य आधार बन्यो।
-1793683160.jpg)
-1793683160.jpg)
