काठमाडौं । जापानको आइची-नागोयामा जारी २०औँ एसियाली खेलकुदमा पुरुष क्रिकेटको प्रतिस्पर्धा बिहीबारदेखि सुरु हुँदैछ। महिला क्रिकेटको स्पर्धा सकिएसँगै पुरुषतर्फको खेल सुरु हुन लागेको हो।
पुरुष क्रिकेटमा यसपटक १० टोली सहभागी छन्। आयोजक जापानसँगै भारत, पाकिस्तान, श्रीलंका, बंगलादेश, अफगानिस्तान, नेपाल, हङकङ, मलेसिया र ओमानले प्रतियोगितामा प्रतिस्पर्धा गर्दैछन्। नेपालले समूह ‘ए’मा आयोजक जापान र अफगानिस्तानसँग प्रतिस्पर्धा गर्नेछ। नेपालले पहिलो खेल सेप्टेम्बर २५ मा अफगानिस्तानसँग र दोस्रो खेल सेप्टेम्बर २६ मा जापानसँग खेल्नेछ। दुवै समूहबाट शीर्ष दुई टोली क्वार्टरफाइनलमा प्रवेश गर्नेछन्।
नेपालले एसियाली खेलकुदमा क्रिकेटको पुरुष स्पर्धामा यसअघि तीनपटक सहभागिता जनाएको छ। तर, तीनै संस्करणमा नेपाली टोली क्वार्टरफाइनलबाटै बाहिरिएको थियो। सन् २०१० को ग्वाङ्झोउ एसियाडमा नेपाल श्रीलंकासँग दुई विकेटले पराजित भएको थियो। २०१४ को इन्चोन एसियाडमा नेपाल अफगानिस्तानसँग आठ रनले पराजित भयो। त्यस्तै, २०२२ को हाङ्झोउ एसियाडमा नेपाल भारतसँग २३ रनले पराजित भएको थियो।
यसपटक भने नेपाल त्यो इतिहास बदल्ने लक्ष्यमा छ। प्रभावशाली अलराउन्डर दीपेन्द्रसिंह ऐरीको कप्तानीमा रहेको नेपाली टोलीमा रोहित पौडेल, सन्दीप लामिछाने, आसिफ शेख, कुशल भुर्तेल, आरिफ शेख, सोमपाल कामी, करण केसी, गुलसन झा, कुशल मल्ललगायत खेलाडी छन्।
एसियाडमा भारत, पाकिस्तान, श्रीलंका र बंगलादेशले आईसीसीको पूर्ण सदस्य राष्ट्र तथा टी-२० वरीयताका आधारमा सिधै क्वार्टरफाइनलमा स्थान बनाएका छन्। त्यसैले समूह चरणमा एक खेल जिते पनि नेपालका लागि अघिल्लो चरणको बाटो खुल्ने सम्भावना बलियो हुनेछ।
समूह विजेता बने नेपालले क्वार्टरफाइनलमा श्रीलंकाको सामना गर्नेछ भने समूह उपविजेता बने भारतसँग भिड्नुपर्ने समीकरण छ। दुवै सम्भावित प्रतिद्वन्द्वीमा अनुभवी तथा अन्तर्राष्ट्रिय स्तरमा स्थापित खेलाडीहरूको उपस्थिति रहेकाले नेपालको चुनौती कठिन देखिन्छ। भारतको टोलीमा श्रेयस अय्यरको कप्तानीमा इशान किशन, अभिषेक शर्मा, अक्षर पटेल, अर्शदीप सिंह, वासिङ्टन सुन्दरलगायत खेलाडी छन्। श्रीलंकाले पनि अनुभवी खेलाडी समेटेर टोली घोषणा गरेको छ।
समूह चरणको पहिलो खेलमा नेपालले सामना गर्ने अफगानिस्तान पनि बलियो टोली हो। डार्बिस रसुलीको कप्तानीमा रहेको अफगानिस्तानको टोलीमा अन्तर्राष्ट्रिय अनुभव भएका खेलाडीहरू छन्। आयोजक जापानले पनि घरेलु मैदानको फाइदा उठाउने प्रयास गर्नेछ। जापानी क्रिकेटले पछिल्लो समय क्षेत्रीय प्रतियोगितामा आफ्नो स्तर सुधार गर्दै आएको छ। त्यसैले नेपालले जापानलाई पनि सहज प्रतिद्वन्द्वीका रूपमा लिन सक्ने अवस्था छैन।
आईसीसीको पछिल्लो टी-२० अन्तर्राष्ट्रिय वरीयतामा भारत शीर्ष स्थानमा छ। पाकिस्तान छैटौँ, बंगलादेश आठौँ, श्रीलंका नवौँ, अफगानिस्तान १०औँ र नेपाल १६औँ स्थानमा छन्। नेपालका लागि यसपटकको एसियाड पुरुष क्रिकेट विगतको क्वार्टरफाइनल बाधा पार गर्दै थप अघि बढ्ने अवसरका रूपमा रहनेछ।
-1790161248.jpg)
-1789817539.jpg)
-1790161248.jpg)
-1789817539.jpg)
