काठमाडौं । पाकिस्तानको ब्रोड पिक हिमाल आरोहणका क्रममा गएको भीषण हिमपहिरोमा ज्यान गुमाएका अनुभवी नेपाली पर्वतारोही पुरबहादुर गुरुङ (युक्त) को शुक्रबार काठमाडौंको स्वयम्भूमा धार्मिक परम्पराअनुसार अन्त्येष्टि गरिएको छ। अन्तिम संस्कारअघि स्वयम्भू परिसरमा उनको पार्थिव शरीरमा श्रद्धाञ्जली अर्पण गरिएको थियो।
श्रद्धाञ्जली कार्यक्रममा गृहमन्त्री सुधन गुरुङ, पूर्वउपसभामुख इन्दिरा रानामगर, नेपाल पर्वतारोहण संघका पदाधिकारी, पर्यटन क्षेत्रका प्रतिनिधि तथा पर्वतारोहण समुदायका सदस्यहरूको उपस्थिति रहेको थियो। गृहमन्त्री गुरुङले दिवंगत पर्वतारोही गुरुङको पार्थिव शरीरमा राष्ट्रिय झण्डा ओढाएर सम्मान व्यक्त गरेका थिए। गत साता पाकिस्तानको ब्रोड पिकमा आएको हिमपहिरोमा पुरबहादुर गुरुङसहित विश्वप्रसिद्ध नेपाली पर्वतारोही निर्मल पुर्जा लगायत ६ नेपाली तथा अन्य विदेशी आरोही गरी १० जनाको मृत्यु भएको थियो। गुरुङको पार्थिव शरीर बिहीबार नेपाल ल्याइएको थियो।
गोरखाको लाप्राक निवासी ३७ वर्षीय पुरबहादुर गुरुङ नेपालको पर्वतारोहण क्षेत्रमा अत्यन्त अनुभवी हिमाली गाइडका रूपमा परिचित थिए। उनले सगरमाथाको १० पटक सफल आरोहण गर्नुका साथै ८ हजार मिटरभन्दा अग्ला विभिन्न हिमाल २८ पटक सफलतापूर्वक आरोहण गरेका थिए। विश्वका १४ अग्ला हिमालमध्ये १२ वटा हिमाल आरोहण गरिसकेका उनी अन्तर्राष्ट्रिय पर्वतीय गाइड संघबाट प्रमाणित करिब १०० नेपाली गाइडमध्ये एक थिए। उनको योगदान नेपालमै सीमित थिएन। सन् २०२४ मा सगरमाथामा करिब एक शताब्दी पुरानो बुट फेला पार्ने ऐतिहासिक अभियानमा पनि उनी सहभागी थिए। उक्त बुट सन् १९२४ मा सगरमाथा आरोहणका क्रममा बेपत्ता भएका बेलायती पर्वतारोही एन्ड्रयू इरभिनको भएको विश्वास गरिएको छ, जसलाई विश्व पर्वतारोहण इतिहासको महत्वपूर्ण खोजमध्ये एक मानिन्छ।
नेपाल पर्यटन विभागका प्रवक्ता हिमाल गौतमले पुरबहादुर गुरुङको निधनलाई नेपाली पर्वतारोहण क्षेत्रका लागि अपूरणीय क्षति भएको बताएका छन्। उनले ब्रोड पिक दुर्घटनाले नेपालको पर्वतारोहण क्षेत्रलाई ठूलो धक्का दिएको उल्लेख गर्दै उच्च हिमाली जोखिम व्यवस्थापन, सुरक्षा मापदण्ड र उद्धार प्रणालीलाई अझ प्रभावकारी बनाउनुपर्ने आवश्यकता औँल्याए।
पुरबहादुर गुरुङको निधनसँगै नेपालले एक कुशल पर्वतारोही मात्र होइन, विश्वसामु नेपालको पर्वतारोहण प्रतिष्ठा उचो बनाउन महत्वपूर्ण योगदान पुर्याएका समर्पित हिमाली गाइडलाई पनि गुमाएको छ।
-1786098648.jpeg)
-1786098648.jpeg)
