काठमाडौं । युरोपेली फुटबलको सर्वोच्च निकाय UEFA ले विश्व फुटबलको नियामक संस्था FIFA लाई सम्भावित कानुनी प्रक्रियाका लागि प्रमाण सुरक्षित राख्न औपचारिक ‘प्रिजर्भेसन लेटर’ (Preservation Letter) पठाएको पुष्टि गरेको छ। फिफा अध्यक्ष जियानी इन्फान्टिनोले भविष्यका विश्वकपबाट हुने आम्दानीको हिस्सा निजी लगानीकर्तालाई बिक्री गर्ने विवादास्पद योजना अघि सारेपछि यूईएफएले कानुनी कदमको तयारी थालेको हो।
अल जजिराका अनुसार यूईएफएले इमेलमार्फत पत्र पठाएको पुष्टि गर्दै यस विषयमा तत्काल थप टिप्पणी नगर्ने जनाएको छ। यस्तो पत्र सम्भावित कानुनी विवादमा प्रमाणका रूपमा प्रयोग हुन सक्ने कागजात, इमेल, डिजिटल सन्देश र अन्य सामग्री नष्ट हुन नदिन पठाइन्छ। इन्फान्टिनोले न्यूयोर्कस्थित लगानी समूहसँग मिलेर करिब ४.२ अर्ब अमेरिकी डलर जुटाउने गोप्य योजना अघि सारेका थिए। योजना सार्वजनिक भएपछि विश्वभर तीव्र आलोचना सुरु भयो र अन्ततः उनले त्यसलाई फिर्ता लिन बाध्य भए।
योजनाको सबैभन्दा कडा विरोध यूईएफएले गरेको थियो। यूईएफएका ५५ सदस्य राष्ट्रका फुटबल संघहरूले योजना कायम रहेसम्म फिफाका प्रतियोगिता र कार्यक्रम बहिष्कार गर्ने निर्णयसमेत गरेका थिए। द एसोसिएटेड प्रेस (एपी) का अनुसार यूईएफएका कानुनी प्रतिनिधिहरूले फिफालाई पठाएको पत्रमा FIFA Forward Enterprise (FFE) योजनासम्बन्धी विषयमा अदालत, मध्यस्थता तथा नियामक निकायमा उजुरी दिने विकल्पमाथि गम्भीर रूपमा विचार भइरहेको उल्लेख गरेका छन्।
पत्रमा प्रमाण नष्ट गर्ने, परिवर्तन गर्ने वा लुकाउने कुनै पनि प्रयासलाई ‘स्पोलिएसन अफ एभिडेन्स’ मानिने चेतावनी दिइएको छ। उक्त पत्रमा इन्फान्टिनोसहित फिफाका १८ वरिष्ठ अधिकारीको नाम समावेश गरिएको छ। यसैबीच, स्विडेन फुटबल महासंघले यूईएफएले आगामी फिफा अध्यक्ष निर्वाचनका लागि वैकल्पिक उम्मेदवार खोजिरहेको पुष्टि गरेको छ। यूईएफएले इन्फान्टिनोले विश्व फुटबलको विश्वास गुमाइसकेको भन्दै उनको नेतृत्व अन्त्य हुनुपर्ने संकेत दिएको छ।
विवादित FFE योजनाअनुसार सन् २०३८ सम्म फिफाको व्यावसायिक तथा प्रतियोगितासम्बन्धी आम्दानी व्यवस्थापन गर्ने अधिकार निजी कम्पनीलाई दिने प्रस्ताव गरिएको थियो। फिफाले यसको मूल्य २० अर्ब अमेरिकी डलर आँकेको थियो र सदस्य राष्ट्रहरूलाई विकास सहयोग रकम उल्लेखनीय रूपमा बढ्ने दाबी गरेको थियो। तर योजनाले फुटबलको सुशासन, पारदर्शिता र स्वतन्त्रतामाथि प्रश्न उठाएको भन्दै व्यापक विरोध भएको थियो।
यूईएफएसँगै एशियन फुटबल कन्फेडेरेसन (AFC) र CONCACAF ले पनि योजनाको विरोध गरेका छन्। यद्यपि, अफ्रिकी सदस्य राष्ट्रहरूबाट भने इन्फान्टिनोलाई अझै बलियो समर्थन रहेको बताइएको छ। विश्व फुटबलमा एक दशकभन्दा बढी समयदेखि प्रभावशाली रहेका इन्फान्टिनो अहिले आफ्नो नेतृत्वकै सबैभन्दा ठूलो संकटमा परेका छन्। आगामी मार्चमा मोरक्कोमा हुने फिफा अध्यक्ष निर्वाचनअघि उनीमाथि कानुनी, राजनीतिक र संस्थागत दबाब निरन्तर बढिरहेको छ।
-1785817866.jpeg)
-1785817866.jpeg)
