काठमाडौं । बेलायतको राजनीतिमा ठूलो हलचल मच्चिएको छ। प्रधानमन्त्री केयर स्टारमरले पदबाट राजीनामा दिएपछि अब उनको उत्तराधिकारी को बन्ने भन्ने विषयमा तीव्र बहस सुरु भएको छ। यहीबीच लेबर पार्टीका लोकप्रिय नेता एन्डी बर्नह्याम भावी प्रधानमन्त्रीका रूपमा सबैभन्दा बलियो दाबेदारका रूपमा उभिएका छन्।
हालै सम्पन्न मेकरफिल्ड उपनिर्वाचन जितेर संसदमा प्रवेश गरेका बर्नह्यामले प्रधानमन्त्री पदका लागि आफ्नो उम्मेदवारी घोषणा गरिसकेका छन्। पार्टीभित्र बढ्दो लोकप्रियता र जनसमर्थनका कारण उनी लामो समयदेखि राष्ट्रिय राजनीतिको केन्द्रमा थिए। विश्लेषकहरूका अनुसार उनको प्रभावले नै स्टारमरमाथि दबाब बढाएको थियो।
सन् १९७० मा लिभरपुलमा जन्मिएका बर्नह्यामको बाल्यकाल सामान्य परिवारमा बितेको थियो। उनका बुबा दूरसञ्चार कम्पनीका इन्जिनियर थिए भने आमा स्वास्थ्य क्लिनिकमा रिसेप्शनिस्टको रूपमा कार्यरत थिइन्। परिवारको राजनीतिक झुकाव लेबर पार्टीतर्फ थियो, जसले बर्नह्यामको सोचमा पनि प्रभाव पारेको थियो।
रोचक कुरा के छ भने बर्नह्याम राजनीतिमा कुनै नेताको भाषण सुनेर होइन, एउटा टेलिभिजन नाटकबाट प्रेरित भएर आएका थिए। किशोर अवस्थामै बेरोजगारी र आर्थिक संकटमाथि आधारित कार्यक्रम हेरेपछि उनले समाज परिवर्तनका लागि राजनीतिमा लाग्ने निर्णय गरेका थिए।
शिक्षाका लागि उनले क्याम्ब्रिज विश्वविद्यालयबाट अंग्रेजी साहित्य अध्ययन गरे। त्यहाँ अध्ययनका क्रममा उनले विभिन्न चुनौती सामना गरे पनि त्यसले उनको व्यक्तित्वलाई अझ परिपक्व बनायो। संगीतप्रतिको उनको गहिरो रुचिले पनि उनको सोच र राजनीतिक दृष्टिकोण निर्माणमा महत्वपूर्ण भूमिका खेलेको बताइन्छ।
बर्नह्यामको व्यक्तिगत जीवन पनि निकै रोचक छ। क्याम्ब्रिज विश्वविद्यालयमै अध्ययनका क्रममा भेटिएकी मेरी–फ्रान्स भ्यान हीलसँग उनले सन् २००० मा विवाह गरेका थिए। अहिले उनीहरूका तीन सन्तान छन् र परिवारसहितको जीवनलाई उनले सधैं प्राथमिकतामा राख्ने गरेका छन्।
आज बेलायतको प्रधानमन्त्री बन्ने चर्चामा रहेका बर्नह्यामको करियर भने राजनीतिबाट सुरु भएको थिएन। उनले पत्रकारिताबाट आफ्नो पेशागत यात्रा सुरु गरेका थिए। विभिन्न पत्रिकामा काम गरेपछि उनले राजनीतिक अनुसन्धानकर्ताको रूपमा अवसर पाए र त्यहीँबाट उनको राजनीतिक यात्रा अघि बढ्यो।
सामान्य परिवार, पत्रकारिताबाट सुरु भएको करियर, र लेबर पार्टीभित्रको बढ्दो प्रभावका कारण एन्डी बर्नह्याम अहिले बेलायती राजनीतिका सबैभन्दा चर्चित अनुहारमध्ये एक बनेका छन्। अब सबैको नजर उनी साँच्चिकै बेलायतको नयाँ प्रधानमन्त्री बन्छन् कि बन्दैनन् भन्नेमा केन्द्रित भएको छ।
