काठमाडौं । गत शुक्रबारदेखि प्रदर्शनमा आएको नेपाली चलचित्र ‘रोल नं १’ले घरेलु बक्स अफिसमा अपेक्षाअनुसार व्यापार गर्न नसके पनि दर्शक र कलाकारहरूबाट सकारात्मक प्रतिक्रिया बटुलिरहेको छ। शिक्षा प्रणाली, अभिभावकको अपेक्षा र बालबालिकाको रुचिबीचको द्वन्द्वलाई केन्द्रमा राखेर निर्माण गरिएको फिल्मले धेरै दर्शकलाई भावुक बनाएको छ।
फिल्मप्रति दर्शकको बढ्दो सकारात्मक प्रतिक्रियापछि निर्माण टिमले सोमबार काठमाडौंमा विशेष ‘सेलिब्रेटी शो’ आयोजना गरेको थियो। कार्यक्रममा चलचित्र क्षेत्रका विभिन्न कलाकार तथा व्यक्तित्वहरूको उपस्थिति रहेको थियो। फिल्म हेरेपछि सहभागी कलाकारहरूले यसको विषयवस्तु, सन्देश र प्रस्तुतिको खुलेर प्रशंसा गरेका छन्।
अभिनेत्री लुनिभा तुलाधारले ‘रोल नं १’ हरेक अभिभावकले हेर्नैपर्ने फिल्म भएको बताइन्। उनका अनुसार फिल्मले बालबालिकाको वास्तविक रुचि र क्षमतालाई बुझ्न अभिभावकलाई प्रेरित गर्छ। छोराछोरीमाथि आफ्ना सपना थोपर्नुभन्दा उनीहरूको चाहना र प्रतिभालाई सम्मान गर्नुपर्ने सन्देश फिल्मले दिएको उनको भनाइ छ।
हास्य कलाकार जितु नेपाल (मुन्द्रे)ले फिल्मले शिक्षा र सफलताको परम्परागत परिभाषामाथि प्रश्न उठाएको बताए। उनले कक्षाकोठाको नम्बरले मात्र जीवनको सफलता निर्धारण नगर्ने सन्देश फिल्मले प्रभावकारी रूपमा प्रस्तुत गरेको उल्लेख गरे। शिक्षालाई सीप र व्यवहारिक ज्ञानसँग जोड्नुपर्ने आवश्यकतालाई फिल्मले सान्दर्भिक ढंगले उठाएको उनको धारणा थियो।
अभिनेत्री सञ्चिता लुइँटेलले फिल्मको लेखन, प्रस्तुति र भावनात्मक पक्ष निकै सशक्त रहेको प्रतिक्रिया दिइन्। उनले आजका अभिभावक र बालबालिकाले यो चलचित्रबाट धेरै कुरा सिक्न सक्ने बताउँदै शिक्षालाई केवल किताबी ज्ञानमा सीमित नराखी जीवन उपयोगी सीपसँग जोड्नुपर्ने विषयलाई फिल्मले राम्रोसँग चित्रण गरेको उल्लेख गरिन्।
अभिनेता हरिहर अधिकारीले फिल्म हेरिरहँदा आफ्नो विद्यालय जीवनको सम्झना ताजा भएको बताए। विशेषगरी बाबु–छोराबीचको सम्बन्ध, पढाइको दबाब र संघर्षका कथाले आफूलाई निकै छोएको उनको प्रतिक्रिया थियो। त्यस्तै अभिनेत्री नीता ढुंगानाले बालबालिकामाथि थोपरिने शैक्षिक दबाबलाई फिल्मले संवेदनशील र मर्मस्पर्शी ढंगले प्रस्तुत गरेको बताइन्।
निर्देशक जोन योञ्जनको निर्देशन रहेको चलचित्रमा मुकुन भुसाल, सुशांक मैनाली, रेणु नाथ योगी, एवन राज उप्रेती, सिर्जना अधिकारी, निर्भिक रेग्मी, रिन्चेन लामा, संयम कटुवाल र सिजल श्रेष्ठलगायत कलाकारहरूको अभिनय रहेको छ। विनोद पौडेल र जान्वी पौडेल निर्माताको रूपमा रहेका यस फिल्मको सह-निर्मातामा छत्रमाया गिरी र रमेश चौलागाईं छन्।
शिक्षा, अभिभावकीय दबाब र बालबालिकाको मनोविज्ञानलाई केन्द्रमा राखेर निर्माण गरिएको ‘रोल नं १’ले मनोरञ्जनसँगै समाजलाई सोच्न बाध्य बनाउने सन्देश बोकेको भन्दै दर्शक तथा कलाकारहरूबाट प्रशंसा पाइरहेको छ।
-1780461445.jpg)
-1780461445.jpg)
