काठमाडौं । नेपाली मिश्रित मार्सल आर्ट्स खेलाडी रविन्द्र ढाँट विश्वकै प्रतिष्ठित मिश्रित मार्सल आर्ट्स मञ्च यूएफसीको ढोकासम्म पुग्ने ऐतिहासिक अवसरको संघारमा पुगेका छन् ।
मे २८, २०२६ मा मकाउ स्थित ग्यालेक्सी एरेना मा हुने रोड टु यूएफसी सिजन ५ अन्तर्गत रविन्द्रले फिलिपिन्सका किम्बर्ट एलिन्टोजोन सँग प्रतिस्पर्धा गर्ने भएका हुन् । यसअघि अस्ट्रेलियाली खेलाडी म्याटी ल्यानसँग भिड्ने तय भए पनि चोटका कारण प्रतिस्पर्धी परिवर्तन गरिएको हो । नयाँ भिडन्तसँगै खेलको रणनीतिक स्वरूप पनि फेरिएको विश्लेषण गरिएको छ ।
‘बझाङको बाघ’ उपनामले परिचित रविन्द्र आफ्नो आक्रामक खेलशैली, सटिक प्रहार र मानसिक मजबुतीका कारण चर्चामा छन् । भारतीय प्रतियोगिता एमएफएनको उपाधि जितेपछि उनको आत्मविश्वास झन् बढेको बताइन्छ ।
विश्लेषकहरूका अनुसार ‘ब्यान्टमवेट’ तौल समूहमा प्रतिस्पर्धा गर्ने रविन्द्रले आफ्नो लामो पहुँच, तल्लो प्रहार र आक्रामक समात्ने शैलीमार्फत खेल सुरुवातदेखि नै नियन्त्रणमा लिन सक्ने क्षमता राख्छन् । यदि उनले प्रभावशाली प्रदर्शन गर्न सके, नेपाली मिश्रित मार्सल आर्ट्स इतिहासमै पहिलो पटक यूएफसीसँग व्यावसायिक सम्झौता गर्ने खेलाडी बन्ने सम्भावना बलियो रहनेछ ।
सन् १९९८ मा बझाङ मा जन्मिएका रविन्द्रको यात्रा संघर्षपूर्ण रहँदै आएको छ । भारतमा मजदुरी गर्दै जीवन अगाडि बढाएका उनले कठिन परिस्थितिबाट उठेर अन्तर्राष्ट्रिय मिश्रित मार्सल आर्ट्स मञ्चसम्मको यात्रा तय गरेका हुन् । उनको सफलताले व्यक्तिगत करिअर मात्र नभई नेपाली मिश्रित मार्सल आर्ट्स क्षेत्रको अन्तर्राष्ट्रिय पहिचान र सम्भावनालाई पनि नयाँ उचाइ दिने अपेक्षा गरिएको छ ।
नेपाली समयअनुसार खेल बिहान पौने ६ बजे सुरु हुनेछ । करोडौं नेपाली समर्थकको ध्यान अहिले मकाउमा हुने यही ऐतिहासिक भिडन्तमा केन्द्रित छ ।
-1778670114.webp)
-1778653996.jpeg)
-1778670114.webp)
-1778653996.jpeg)
