काठमाडौँ । भारतीय मनोरञ्जन क्षेत्रमा सुनिल ग्रोभर यस्तो कलाकारका रूपमा स्थापित भएका छन्, जसले केवल नक्कल मात्र गर्दैनन्, बरु चरित्रलाई बाँच्ने गर्छन्। उनको अभिनय शैलीले उनलाई अन्य कमेडियनभन्दा अलग पहिचान दिलाएको छ।
सलमान खान ले समेत ग्रोभरको प्रशंसा गर्दै उनले कमेडी गर्ने प्रयास नगरी चरित्रमै प्रवेश गर्ने बताएका थिए। त्यस्तै आमिर खान ले पनि ग्रोभरले व्यक्तिको सोचसम्म बुझेर अभिनय गर्ने बताएका छन्।
हाल Netflix मा प्रसारण भइरहेको द ग्रेट इन्डियन कपिल शो मा ग्रोभरले ‘फादर खान’ लगायतका चरित्रमार्फत दर्शकलाई पुनः चकित बनाएका छन्। उक्त शोमा डेभिड धवन, वरुण धवन लगायत कलाकारहरूले उनको अभिनयको खुलेर प्रशंसा गरेका छन्।
ग्रोभरले दिवंगत अभिनेता कादर खान को चरित्रलाई जीवन्त रूपमा प्रस्तुत गरेपछि सामाजिक सञ्जालमा निकै चर्चा बटुलेका छन्। अभिनेता गजराज राव ले उनलाई चरित्रको आत्मासम्म पुग्ने कलाकारका रूपमा वर्णन गरेका छन्। उनको अभिनय यात्राको सुरुआत जसपाल भट्टी को शो ‘फुल टेन्सन’बाट भएको थियो। पछि रेडियो र टेलिभिजनमार्फत उनले आफ्नो प्रतिभा स्थापित गरे। विशेषगरी द कपिल शर्मा शो मा ‘गुत्थी’ जस्ता पात्रहरूले उनलाई घर-घरमा परिचित बनायो।
ग्रोभरको सफलता पछाडि उनको सूक्ष्म अवलोकन क्षमता मुख्य मानिन्छ। उनी मानिसहरूको बोल्ने शैली, हाउभाउ र व्यवहारलाई गहिरो रूपमा बुझेर त्यसलाई अभिनयमा उतार्छन्। यही कारणले गर्दा उनका चरित्रहरू केवल नक्कल नभई जीवन्त अनुभव जस्तै लाग्छन्।
मनोरञ्जन क्षेत्रमा धेरै कलाकारहरूले मिमिक्री गर्छन्, तर सुनिल ग्रोभरले त्यसलाई नयाँ उचाइ दिएका छन्। उनले देखाएका छन्-साँचो कलाकार त्यो हो, जसले चरित्रलाई केवल देखाउँदैन, त्यसलाई बाँचेर दर्शकसमक्ष प्रस्तुत गर्छ।
