काठमाडौं । इरानका युवा तथा खेलकुदमन्त्री अहमद दुन्यामालीले देशको वर्तमान सुरक्षा अवस्थाका कारण २०२६ फिफा विश्वकपमा सहभागिता अनिश्चित बनेको बताएका छन्।
आईआरआईबी स्पोर्ट्स नेटवर्कसँगको अन्तर्वार्तामा मन्त्री दुन्यामालीले देशको राजनीतिक तथा सुरक्षा परिस्थिति प्रतिकूल रहेको भन्दै विश्वकपमा सहभागी हुने उपयुक्त अवस्था नरहेको बताएका हुन्। उनले भने, “हाम्रो नेताको हत्या भएको अवस्थामा हामीसँग विश्वकपमा सहभागी हुने वातावरण छैन। खेलाडीहरूको सुरक्षाको पनि गम्भीर चिन्ता छ।”
सन् २०२६ को २०२६ फिफा विश्वकप जुन ११ देखि संयुक्त राज्य अमेरिका, क्यानडा र मेक्सिकोमा आयोजना हुँदैछ। प्रतियोगितामा इरानले समूह चरणमा जुन १५ मा न्युजिल्याण्ड, जुन २१ मा बेल्जियम र जुन २६ मा इजिप्टसँग प्रतिस्पर्धा गर्ने तालिका रहेको छ। हालै अमेरिका र इजरायलले गरेको आक्रमणमा इरानका सर्वोच्च नेता अली खामेनीको हत्या भएपछि क्षेत्रीय तनाव चुलिएको बताइएको छ। त्यसको प्रतिक्रियास्वरूप इरानले इजरायल तथा अमेरिकी सैन्य आधार रहेका क्षेत्रमा मिसाइल र ड्रोन प्रहार गरेको जनाइएको छ।
यता फिफाका अध्यक्ष जियानी इन्फान्टिनोले भने विश्वकपले विश्वलाई एकताबद्ध बनाउने भन्दै इरानलाई प्रतियोगितामा सहभागी हुन स्वागत गर्न तयार रहेको बताएका छन्। उनले डोनाल्ड ट्रम्पसँग भेटपछि सामाजिक सञ्जालमार्फत यस्तो धारणा व्यक्त गरेका थिए। यसैबीच इरान फुटबल महासंघका अध्यक्ष मेहदी ताजले पनि सुरक्षा अवस्थाका कारण टोलीलाई अमेरिका पठाउने विषयमा प्रश्न उठाएका छन्।
यदि इरानले औपचारिक रूपमा विश्वकपबाट नाम फिर्ता लिएमा प्रतिस्थापन टोली छनोट गर्ने अधिकार फिफासँग रहनेछ। सम्भावित रूपमा एसियन फुटबल महासंघ अन्तर्गतका टोलीहरू जस्तै इराक वा संयुक्त अरब इमिरेट्सलाई अवसर मिल्न सक्ने अनुमान गरिएको छ।
हालका लागि भने फिफाले इरानले निर्धारित खेलहरू खेल्ने अपेक्षा कायम राखेको जनाएको छ।
-1773293850.jpg)
-1773293850.jpg)
