काठमाडौं । नेपाली हास्य क्षेत्रमा एउटा युगको अन्त्य भएको छ। लोकप्रिय हास्य कलाकार खेम शर्माको ६५ वर्षको उमेरमा निधन भएको छ। पछिल्लो समय अमेरिकामा बसोबास गर्दै आएका शर्मा क्यान्सर रोगसँग संघर्षरत थिए।
खेम शर्मा नेपाली दर्शकमाझ विशेषगरी चतुरेको दाउपेचु टेलिसिरियलमार्फत 'चतुरे' पात्रका रूपमा अत्यन्त लोकप्रिय बनेका थिए। उनको स्वाभाविक अभिनय, मिठो हास्य शैली र प्रभावशाली संवाद प्रस्तुतिले लाखौं दर्शकको मन जितेको थियो। एक समय नेपाली टेलिभिजनमा 'चतुरे' नाम नै उनको परिचय बनेको थियो।
खेम शर्माको सफल यात्रामा कलाकार शिवहरि पौडेलसँगको सहकार्य विशेष चर्चित रह्यो। पौडेल र शर्माको जोडीलाई नेपाली हास्य क्षेत्रमा मह जोडीपछि सबैभन्दा सफल र लोकप्रिय जोडीमध्ये एक मानिन्थ्यो। उनीहरूले टेलिसिरियल, चलचित्र र रंगमञ्चमा सँगै अभिनय गर्दै दर्शकलाई लामो समयसम्म मनोरञ्जन प्रदान गरेका थिए।
शर्माको निधनपछि कलाकार शिवहरि पौडेलले गहिरो दुःख व्यक्त गरेका छन्। सामाजिक सञ्जालमार्फत उनले आफ्नो लामो समयको सहयात्री गुमाएको पीडा व्यक्त गर्दै खेम शर्मालाई नेपाली कला क्षेत्रको अमूल्य रत्नको संज्ञा दिएका छन्।
खेम शर्माले हास्य अभिनयमा मात्र होइन, नेपाली चलचित्र क्षेत्रमा पनि महत्वपूर्ण योगदान दिएका थिए। उनले करोडपति, नेपाली बाबु, बेइमानी, आवारा, यस्तै रहेछ पिरती, गोठालो, अधिकार, सौगात, झझल्को, घर-आँगन, परेली र लौन यो मायाले सतायो लगायत दर्जनौं नेपाली चलचित्रमा अभिनय गरेका थिए।
खेम शर्माको निधनसँगै नेपाली हास्य अभिनयको एउटा अविस्मरणीय अध्याय समाप्त भएको छ। तर उनले सिर्जना गरेका पात्रहरू, दर्शकलाई दिएका हाँसोका क्षणहरू र नेपाली मनोरञ्जन क्षेत्रमा पुर्याएको योगदान भने सधैं स्मरणीय रहनेछ।
-1781930061.jpg)
-1781930061.jpg)
