काठमाडौं । आगामी बैशाख १० गते हुने प्रतिनिधिसभा सदस्यको उपनिर्वाचनका लागि निर्वाचन आयोगमा २६ वटा दल दर्ता भएका छन् । केही दिनअघि आयोगले दल दर्ताका लागि आह्वान गरेको थियो ।
उपनिर्वाचनका लागि २६ वटा दल दर्ता भएको आयोग प्रवक्ता शालिकराम शर्माले जानकारी दिऐ । तनहुँ क्षेत्र नम्बर १, बारा क्षेत्र नम्बर २ र चितवन क्षेत्र नम्बर २ मा बैशाख १० गते उप निर्वाचन हुँदैछ ।
चितवन २ मा राष्ट्रिय स्वतन्त्र पार्टीका सभापति रवि लामिछाने निर्वाचित भएका थिए । तर, नागरिकता प्रकरणमा दोषी पाइएपछि उनको सांसद पद खारेज भएको थियो । उक्त निर्वाचन क्षेत्रमा फेरि लामिछानेले नै उम्मेदवारी दिने तयारी गरेका छन् ।
यस्तै, तनहुँ १ बाट निर्वाचित रामचन्द्र पौडेल राष्ट्रपतिमा निर्वाचित भएपछि र बारा २ बाट निर्वाचित जनता समाजवादी पार्टीका रामसहाय यादव उपराष्ट्रपतिमा निर्वाचित भएसँगै यी क्षेत्र रिक्त छन् । यी क्षेत्रमा पनि निर्वाचन आयोगले एकैपटक वैशाखा १० उपनिर्वाचन गर्दैछ ।