मन्त्रालय बाँडफाँटमा सत्तारुढ गठबन्धन असफल, साँझ पुनः प्रयास गरिने

राजनीति

गृहपृष्ठ
राजनीति
मन्त्रालय बाँडफाँटमा सत्तारुढ गठबन्धन असफल, साँझ पुनः प्रयास गरिने

मन्त्रालय बाँडफाँटमा सत्तारुढ गठबन्धन असफल, साँझ पुनः प्रयास गरिने सरकार गठन भएको डेढ महिना बितिसक्दा पनि मन्त्रिपरिषद् विस्तारमा सत्तारुढ पाँच दलले सहमति जुटाउन सकेका छैनन् ।

क्यापिटल दैनिक

काठमाडौं । मन्त्रिमण्डल विस्तार र पद बाँडफाँटको टुंगो लगाउन बसेको सत्तारुढ गठबन्धको बैठक बिना निश्कर्ष टुङ्गिएको छ ।

प्रधानमन्त्री शेरबहादुर देउवाको आह्वानमा प्रधानमन्त्रीकै सरकारी निवास बालुवाटारमा मंगलबार बिहान ९ बजेदेखि बसेको सत्तारुढ गठबन्धनको बैठक बिनानिष्कर्ष सकिएको हो । सरकार गठन भएको डेढ महिना बितिसक्दा पनि मन्त्रिपरिषद् विस्तारमा सत्तारुढ पाँच दलले सहमति जुटाउन सकेका छैनन् । मन्त्रालयको भागबण्डा मिलाउन नसकेपछि पाँच दलको बैठक बिना निष्कर्ष उठेको हो ।

यो बैठकमा नेपाली कांग्रेस, माओवादी केन्द्र, नेकपा (एकीकृत समाजवादी), जनता समाजवादी र राष्ट्रिय जनमोर्चाका शीर्ष नेताहरुबीच छलफल भएको थियो । सहमति जुट्न नसकेपछि आजै साँझ फेरी बस्ने गरी गठबन्धन बैठक उठेको छ । प्रधानमन्त्री देउवाको सचिवालयले बेलुका पनि सहमतिको प्रयास हुने बताएको छ ।

आज साँझको बैठकमा पाँच दलका सभापति र अध्यक्षहरू मात्रै बस्ने तयारी छ । मन्त्रालय भागबण्डामा गठबन्धनका सदस्य नेताहरुले अडान नछाडेपछि मन्त्रिपरिषद् विस्तारको गाँठो झन् कसिलो भएको छ ।

पाँच दलमध्ये कांग्रेस, माओवादी, नेकपा (एकीकृत समाजवादी) र जनता समाजवादीबीच ६ मन्त्री र एक राज्य मन्त्री लिने करिब सहमति भएको छ । तर सत्तारुढ गठबन्धनले मन्त्रालयको भागवण्डा गर्न नसक्दा समस्या भएको हो । आज सहमति जुटेको अवस्थामा बुधबारसम्म मन्त्रिपरिषद् विस्तार हुने बताइएको थियो ।

हिजो मात्रै सत्ता साझेदार माओवादी केन्द्रका अध्यक्ष पुष्पकमल दाहाल प्रचण्डले बुधबारसम्म मन्त्रिपरिषद् विस्तार भएर सरकारले गति लिने बताएका थिए ।

तर सत्तारुढ दलहरु आफ्नो अडानमा कायम रहेपछि भोलि पनि मन्त्रिपरिषद् विस्तारको सम्भावना न्यून रहेको देउवानिकट स्रोतले बताएको छ ।

प्रकाशित मिति: मंगलबार, भदौ १५, २०७८ १३:५०

प्रतिक्रिया दिनुहोस्